Өскеменде жастарға арналған IT-хаб ашылуы мүмкін
Облыс орталығында жастарды IT-саладағы дағдыларға үйрету үшін арнайы IT-хабтар ашылуы мүмкін.
Бұл туралы ШҚО-ға жұмыс сапарымен келген ҚР Ақпарат және қоғамдық даму вице-министрі Евгений Кочетов мәлімдеді, деп хабарлайды Altaynews тілшісі.
– Елімізде жастар ресурстық орталықтары бар және біз олардың базасында пилоттық түрде IT-хабтар ашуды бастаймыз. Онда бағдарламалау дағдылары бастапқы кезеңнен бастап аяқталған жобаға дейін оқытылады, оған қаражат тартуға болады. Мұндай алғашқы IT-хабты Талдықорғанда ашуды жоспарлап отырмыз. Бұл жобаны Өскеменде де жүзеге асырамыз деп үміттенемін, – деді Евгений Кочетов.
Вице-министрдің айтуынша, аталған жоба жастар арасында өте танымал және пайдалы.
Айта кету керек, Президент Қасым-Жомарт Тоқаевтың «Әділетті Қазақстан: бәріміз және әрқайсымыз үшін. Қазір және әрдайым» сайлауалды бағдарламасына жыл сайынғы гранттар бөлу арқылы ғылыми және ғылыми-техникалық қызмет нәтижелерін коммерцияландыру үшін жағдай жасау қажеттілігі айтылған.
Оқи отырыңыз
