Өскеменде гүл отырғызу жұмыстары қашан басталады?
Өскемен қаласы мамырдың аяғында гүлге оранады. Қазіргі уақытта шаhарды абаттандыруға дайындық жұмыстары қарқынды жүргізіліп жатыр.
Айта кету керек, ағымдағы жылы гүлзарлардағы топырақтар толықтай ауыстырылып, өсімдіктерді суару жүйесі де ауыстырылады, деп хабарлайды Altaynews тілшісі.
– Гүл отырғызу жұмыстарын 20 мамырда бастауды жоспарлап отырмыз. Ең бастысы, күн райы жылы болса болды. Әдетте маусым айының басында күн суытатын, сондықтан ауа райы болжамын әлі де бақылайтын боламыз, – дейді «Таза Өскемен» мекемесінің басшысы Асхат Тәженов.
Биыл қаладағы көгалдарды суару жүйесі де жаңартылып жатыр. Қазіргі уақытта 67 учаскеде жұмыстар толықтай аяқталған.
– Қазір бұл бағыттағы жұмыстардың 80 пайызы аяқталды. Шамамен, маусым айында толықтай аяқталып, барлық демалыс орындары жаңартылған суару жүйесімен қамтылады, – деп атап өтті Асхат Тәженов.
Естеріңізге сала кетейік, бұған дейін гүлзарларға отырғызуға арналған барлық гүлді астаналық мекеме жеткізіп беретінін жазғанбыз. Ол – еліміздің түкпір-түкпірінде көгалдандыру жұмыстарымен айналысып жүрген тәжірибелі компаниялардың бірі.
Оқи отырыңыз
