Бүгін Өскемен қаласындағы “Борис Щербаковтың жасыл үйі” эко-орталығында балаларға арналған цифрлық эколабораторияның таныстырылымы өтті. Ол лаборатория «Samruk-Kazyna Trust» қорының қолдауының арқасында жабдықталған.
Лаборатория заманауи құрылғылармен, электронды микроскоппен және қаладағы топырақтың, су мен ауаның көрсеткіштерін бақылайтын жинақпен жабдықталған, деп хабарлайды Altaynews тілшісі.
Балалар осы жерде қоршаған ортаны зерттеуге, гидропоника әдісін қолданып, өсімдіктерді өсіруге және өзге де салаларға бағытталған эксперимент жүргізеді.

Балалардың сабағы мен эксперименттерді өңірдегі түрлі жоғары оқу орындарының еріктілері өткізеді. Балалар эко-сабақтарда табиғатты сақтау, экология және жаһандық  деңгейдегі экологиялық мәселелер туралы біледі.

Жобаның қатысушылары “ШҚО-ның Қызыл кітабының” электронды деректер базасын жасаған. Оған биолог-ғалым Борис Щербаков жетекші болған. Қазақстандағы алғашқы электронды Қызыл кітап эко-орталықтың сайтында қолжетімді.
Аталған кітапта аймақтың флорасы мен фаунасы туралы иллюстрациялық жазбалар бар.