Өскеменде «Қазақстан – біздің ортақ үйіміз» экоакциясы өтті
Бүгін Өскеменнің Кемежай шағын ауданында «Қазақстан – біздің ортақ үйіміз» акциясы аясында сенбілік өтті. Іс-шараға алпысқа жуық ерікті қатысты, көбі – университеттер мен колледждердің студенттері, деп хабарлайды Altainews.kz тілшісі.
Қатысушыларға қолғап, қапшық және өзге де құрал-жабдықтар таратылды.
Іс-шара «Қоғамның экологиялық даму орталығы» бірлестігінің ұйымдастыруымен және «Қазақстан қайта өңдеушілер қауымдастығының» басқарма төрағасы Батырбек Әубәкіровтің қолдауымен жүзеге асты.
– Біз бүгін қаламызды тазартуға келдік. Сенбілік өткізу арқылы жастарды қоршаған ортаны қорғауға, таза ұстауға шақырамыз. Осы тұста Өскемен қаласының әкімдігіне, Жастар ресурстық орталығына алғыс айтқым келеді. Жастармен бірге осындай шаралар өткізу арқылы жас ұрпаққа үлгі бола аламыз. Біздің мақсат – осы, – деді «Қоғамның экологиялық даму орталығы» бірлестігінің басшысы Танир Ясса.
Бірнеше сағаттың ішінде қазақтан шыққан тұңғыш әскери ұшқыш Жақып Малдыбаев ескерткішінің айналасы, жол жиегі, сондай-ақ сол маңайда ағып жатқан шағын бұлақ түрлі қоқыстан тазартылды.
– Сенбілікке ағаммен келдім. Мен өз елімді жақсы көремін. Көркем табиғатымызды ластамауымыз керек. Өз қатарластарымды сенбілікке қатысуға шақырамын, – деп ойымен бөлісті акцияға қатысушы ең жас ерікті, 9 жасар Әлімжан Бейбарыс.
Шұғыла Манафья
Оқи отырыңыз
