Өскеменнің жылыту маусымына дайындығы тексеріліп жатыр
Фото: ШҚО энергетика басқармасы
Президент әкімшілігі Өнеркәсіп және құрылыс министрлігімен бірлесіп, Өскемен қаласының алдағы жылыту маусымына дайындығын тексеріп жатыр. Атап айтсақ, №2 қазандыққа тексеру жүргізілді, жылу желілерін жөндеу жұмыстары бағаланды және көмір өткізу орындары тексерілді, деп хабарлайды Altainews.kz тілшісі.
Облыстық энергетика және ТҮКШ басқармасының ақпаратынша, 16 тамыздағы жағдай бойынша №2 қазандықтағы №3 қазанның жабдықтарын жөндеу 70%-ға, ал №4 қазанның жабдықтарын жөндеу 80%-ға, №2 қазанның жабдықтарын жөндеу 90%-ға орындалды. Сорғыны айдау құбырларын құрастыру жұмыстары аяқталды.
Сондай-ақ комиссия өкілдері Пограничная көшесіндегі жылу желілерін жаңарту жобасының іске асуын тексерді. Ондағы жұмыстардың 75%-ы орындалған.
Тексеру аясында делегаттар көмір жеткізу дайындығын бағалау үшін Базовая көшесі, 5 мекенжайында орналасқан «Топливная компания терминал» ЖШС-нің теміржол тұйығында да болды.
Жалпы, тексеру Өскеменде жылыту маусымына дайындық жоспарға сай жүріп жатқанын және барлық жұмыстар кестеге сәйкес орындалатынын көрсетті.