Ауғанстан сауда-экономикалық әлеуетін Астанада көрсетті
Фото: Сауда және интеграция министрлігі
Қазақстан мен Ауғанстанның іскер топтары Астанадағы бизнес-келіссөздерде сауда-экономикалық ынтымақтастықты кеңейту мүмкіндіктерін талқылады.
Ауғанстан қазақстандық ұнды импорттаушы елдер қатарында көш бастап келеді және қазақстандық брендтердің өсімдік майын ең ірі тұтынушыларының бестігіне кіреді, деп хабарлайды Altaynews тілшісі.
Сауда және интеграция министрлігінің дерегінше, өткен жылдың қорытындысы бойынша Ауғанстанмен өзара тауар айналымы шамамен 1 млрд долларды құрады.
Қазақстан Ауған тауарларының импортына да елеулі мән береді. Биыл Гератта Қазақстанның сауда үйі ашылды. Ауған тауар өндірушілерімен ынтымақтастық тауарларды экспорттық-импорттық жеткізу көлемін кеңейтуге ықпал ететін болады.
Өз кезегінде Ауғанстан іскер серіктестерді іздеуге және қазақстандық инвестициялардың келуіне мүдделі. Алдағы Қазақстан-ауған бизнес-форумы өзара тиімді ынтымақтастықтың өзекті мәселелерін талқылау және бірлескен жобаларды іске асыру алаңы болмақ.
Қазақстандық бизнес өкілдерімен кездесуде ауған тарапы өзінің сауда-экономикалық және инвестициялық әлеуетін паш етті. 2021 жылғы мәліметтер бойынша, Ауғанстанның ЖІӨ-нің 55%-ы қызметтер (банкинг, көлік және логистика), ЖІӨ-нің 23%-ы ауыл шаруашылығы секторына тиесілі.
Ауғанстан дәнді дақылдарды, тоқыма бұйымдарын (кілемдерді), қантты, шикізатты, кептірілген жемістерді, жаңа піскен көкөністер мен жемістерді және басқа да агроөнімдерді экспорттайды.
Ауғанстан өкілдерінің айтуынша, ел билігі инвесторларға инвестиция салу үшін тартымды жағдайлар мен бизнесті жүргізу үшін түрлі артықшылықтар беруге дайын. Мысалы, өңдеу секторында және тау-кен өнеркәсібінде жұмыс істейтін шетелдік кәсіпорындар техника сатып алуға салынатын салықтан босатылады. Инвесторлар банктік шоттар ашып, табыс салығы бойынша жеңілдіктер ала алады.
Ауғанстан энергетика саласына, автомобиль жолдары мен теміржол құрылысына, сондай-ақ телекоммуникацияға инвестиция салуға мүдделі.
QazTrade шикізаттық емес экспортын ілгерілету жөніндегі оператор ұйымдастырған В2В келіссөздер алаңына 150-ден астам қазақстандық компаниялар мен ауған іскер топтарының 200-ден астам өкілдері қатысты.
