Көшпенділер ойындары кезінде қазақ ауылы тігіледі
Фото: Kazinform
Биыл күзде Астанада V дүниежүзілік көшпенділер ойындары өтеді. Айтулы шараға 89 мемлекет қатысатынын растады. Бұл туралы Туризм және спорт вице-министрі Серік Жарасбаев мәлім етті, деп хабарлайды Altainews.kz тілшісі Kazinform агенттігіне сілтеме жасап.
– Ойындар 21 спорт түрінен өтеді, оның ішінде ұлттық ойындар да бар. Ол үшін 7 спорт кешенінде дайындық жүріп жатыр. Сол сияқты «Қазанат» ипподромы маңында қазақ ауылын құратын боламыз, яғни киіз үйлер тігіледі, – деді Серік Жарасбаев.
Сондай-ақ Дүниежүзілік көшпенділер ойындары кезінде ұлттық ғылыми конференция өткізу жоспарланып отыр.
– 89 ел көшпенділер ойындарына қатысатынын растады және оны 100 мемлекетке дейін жеткіземіз деген сенімдеміз. Делегация, спортшыларды қосқанда 2500-ден аса қонақ келеді. Шетелдік меймандарды орналастыру үшін елорда әкімдігімен бірлесіп 32 қонақ үйді дайындап жатырмыз, – дейді ол.
Астанадағы ШЫҰ саммитіне келген меймандарға көшпенділер ойындарына дайындық барысы таныстырылды. Арасында Германия, Үндістан, Испания, Италия, Оңтүстік Корея, Ливан, Малайзия, Норвегия, Сербия, Чехиядан келген делегаттар мен журналистер бар.
Айта кетейік, дүниежүзілік көшпенділер ойындары UNESCO қолдауымен өтеді.
Оқи отырыңыз
