Демалыс базаларының иелері мен демалушылар кеше түстен бастап жағалаудағы бірқатар демалыс үйлерінде электр қуатының болмағанына шағымданды. 32 градус ыстықта тоңазытқыштар, мұздатқыштар, электр пештері мен кондиционерлер сөніп қалды, деп хабарлайды Altainews.kz тілшісі.

Алакөл жағалауындағы демалыс базаларының бірінің иесі Құралай Төлеуованың айтуынша, олардың демалыс үйі әзірге электр қуатымен қамтамасыз етілген.

Оның айтуынша, Алакөл демалыс аймағындағы электр желілері мәселесі барлық кәсіпкерлерді әуреге салып отыр.

Электр желілерінің қуаты соншалықты төмен, қысқа маусымда кернеудің бірнеше рет төмендеуі байқалды, бұл көбінесе тамақтың бүлінуіне, сонымен қатар қонақүй бөлмелеріндегі техникалардың толық істен шығуына әкеп соқтыруда.

Кәсіпкер әйел электр энергиясын тұтынудың өскенін және Алакөлде жаңа қонақүйлердің ашылуын ескере отырып, бұл проблемалардың тек өрши түсетініне сенімді.

Сонымен қатар 2023-2027 жылдарға арналған Абай облысын әлеуметтік-экономикалық дамыту жоспарына сәйкес Алакөл көлінің жағалауын энергиямен жабдықтау үшін Көктал ауылынан Қабанбай ауылына дейін қуаты 110 кВт жоғары вольтты желі салу көзделген.