Жолда абай болайық: полицейлер жүргізушілерге ескерту жасады
Күн қатты ысуы – жолда жүруді де қиындатып жатыр. Осыған байланысты полицейлер жүргізушілерге жолда аса мұқият болуға кеңес береді, деп хабарлайды Altainews.kz тілшісі Polisia.kz порталына сілтеме жасап.
Ақмола облысының тәртіп сақшылары Астана – Қарағанды, Астана – Павлодар және Астана – Қабанбай батыр – Теміртау бағыттарында рейд ұйымдастырып, көлік жүргізушілеріне қауіпсіздік жайлы түсіндіріп жүр.
– Егер жолда келе жатып шаршау немесе ұйқы қысып бара жатса, рөлде отыра бермей, тоқтап демалған жөн. Жолаушы да, жүргізуші де – ең алдымен адам. Адам өмірі бәрінен қымбат. Сол себепті жүргізушілерге салқындап алу үшін су ұсынып жатырмыз, – дейді патрульдік полиция қызметінің взвод командирі Айбек Төлеубаев.
Полицейлер алыс жолға шықпас бұрын көлік жағдайын міндетті түрде тексеріп алуға кеңес береді. Сондай-ақ жолда рөлге отырған әр жүргізуші өз өмірі мен өзгелердің өміріне жауапты екенін ұмытпағаны жөн.
– Құрметті жүргізушілер, сіздерді үйде отбасыңыз күтіп отыр. Сондықтан жолда асықпаңыздар, шаршасаңыз – тоқтап тынығыңыз. Полиция сіздермен бірге, – дейді Айбек Төлеубаев.
Оқи отырыңыз
