Қазақстанда әлеуметтік осал топтар мен жұмыссыз азаматтардың міндетті әлеуметтік медициналық сақтандыру (МӘМС) жүйесіне қатысуы үшін жарналар жергілікті бюджет есебінен төленеді. Бұл туралы Денсаулық сақтау министрлігі мәлімдеді, деп хабарлайды Altainews.kz тілшісі.

Министрлік өкілдерінің айтуынша, бұл шара МӘМС жүйесіне қатысушылар қатарын арттырып, медициналық көмектің баршаға қолжетімділігін қамтамасыз етуге бағытталған.

Жаңа өзгерістерге сәйкес:

Табысы төмен, әлеуметтік тұрғыдан осал азаматтар медициналық көмекке жүгінген кезде олардың жарналары жергілікті атқарушы органдар тарапынан төленеді.

Ресми тіркелген жұмыссыздардың да МӘМС жарналары жергілікті бюджет есебінен төленеді.

Бұл халықаралық тәжірибеге сай келетін қадам болып отыр және азаматтардың қажетті медициналық қызметтерге кедергісіз қол жеткізуін қамтамасыз етуге бағытталған.

Министрлік болжамынша, осы шаралар нәтижесінде 2026 жылы жүйеге шамамен 1 миллион жаңа қатысушы қосылады.