Қазіргі таңда еліміздің 13 өңірінде 28 визит-орталық жұмыс істейді. Оның жетеуі ұлттық парктер аумағында орналасқан. Бұл заманауи, арнайы жабдықталған нысандарда туристер өңірдің көрікті жерлері, экскурсиялар, мәдени және спорттық іс-шаралар туралы толық ақпарат ала алады, деп хабарлайды Altainews.kz тілшісі.

Визит-орталықтар – саяхатшылардың өңірмен алғашқы танысу орны. Мұнда қонақтар тиімді маршрут таңдап, белсенді демалыс пен мәдени шаралар жайлы біле алады. Сондай-ақ көлік, тамақтану және қонақүй қызметі туралы кеңес, туристік карталар мен ақпараттық материалдарды тегін алу мүмкіндігі бар. Қызметтер қазақ, орыс және ағылшын тілдерінде көрсетіледі.

Мұндай нысандар Алакөл, Бурабай, Балқаш, Баянауыл, Имантау-Шалқар секілді танымал орындарда, сондай-ақ «Алтынемел», «Көкшетау», «Сайрам-Өгем», «Шарын», «Іле-Алатауы» сияқты ұлттық парктерде орналасқан.

Визит-орталықтар туристердің жайлы және қауіпсіз демалуына жағдай жасап қана қоймай, өңірлік брендтерді қалыптастыруға, шағын және орта бизнесті дамытуға және жаңа жұмыс орындарын ашуға ықпал етуде. Осылайша, олар Қазақстандағы ішкі және келу туризмін дамытудың маңызды құралына айналып келеді.

Дереккөз: ҚР Туризм және спорт министрлігі