2 қыркүйектен бастап еліміздің бірқатар өңірінде ауа райы құбылып, қолайсыз жағдайлар орын алуы мүмкін. Синоптиктердің хабарлауынша, түнгі уақытта солтүстік пен шығыста топырақ бетінде үсік байқалады. Абай, Қостанай, Ақмола, Қарағанды, Солтүстік Қазақстан және Павлодар облыстарында да осындай құбылыстар болжанып отыр. Кей жерлерде жаңбыр аралас қар жаууы ықтимал, деп хабарлайды Altainews.kz тілшісі.

Жетісу облысында қатты жел тұрып, таулы аудандарда екпіні 23-28 м/с дейін жетеді. Мұнда жоғары және төтенше өрт қаупі сақталады. Ақмола, Қарағанды, Павлодар және Солтүстік Қазақстан облыстарында да түнгі уақытта жауын-шашын күтіліп, қар аралас жаңбыр болуы ықтимал.

Астана қаласында 02 қыркүйекте жоғары өрт қаупі сақталса, Алматыда 2-4 қыркүйек аралығында төтенше өрт қаупі болжанады. Шымкентте жел күшейіп, өрт қаупі жоғары деңгейде қалады.

Абай мен Шығыс Қазақстан облыстарында қатты жаңбыр жауып, бұршақ, найзағай және дауыл күтіледі. Кейбір аймақтарда тұман түсіп, желдің екпіні күшейеді. Бұл өңірлерде де өрт қаупі жоғары. Алматы облысында жел бағытын өзгертіп, күшті соғады. Жетісу облысында да желдің екпіні артады.

Батыс Қазақстан, Атырау және Маңғыстау облыстарында ыстық ауа райы күтіліп, кей аймақтарда температура 35-38 градусқа дейін көтеріледі. Бұл өңірлерде де өрт қаупі төтенше деңгейде сақталады. Ақтөбе облысында да 35 градусқа дейін қатты ыстық болжануда.

Қостанай, Ақмола және Қарағанды облыстарында түнде және таңертең тұман түседі, кей жерлерде найзағай ойнап, желдің екпіні күшейеді. Өрт қаупі жоғары, ал кей аумақтарда төтенше деңгейде. Ұлытау облысында да осындай қауіп сақталып отыр.

Түркістан және Жамбыл облыстарында шаңды дауыл мен күшті жел күтіледі. Қызылорда облысының оңтүстігі мен орталығында да шаңды дауыл болжанып отыр. Бұл аймақтарда төтенше өрт қаупі сақталады.

Солтүстік Қазақстан және Павлодар облыстарында тұман түсіп, найзағай ойнайды. Желдің күші секундына 15-20 метрге дейін жетеді.

Осылайша, қыркүйектің алғашқы күндері еліміздің әр өңірінде ауа райы тұрақсыз болып, бірқатар аймақта үсік, қатты жел, шаңды дауыл және өрт қаупінің артуы күтіледі.