Үкімет отырысында Мемлекет басшысы Қасым-Жомарт Тоқаевтың Жолдауын іске асыру жөніндегі Жалпыұлттық іс-шаралар жоспары қаралды. Құжат 87 тармақтан тұрады, деп хабарлайды Altainews.kz тілшісі.

Жоспардың негізгі бағыттары туралы Премьер-министрдің орынбасары – Ұлттық экономика министрі Серік Жұманғарин баяндады. Оның айтуынша, жоспар 8 негізгі бағыттан тұрады. Олардың қатарында:

• жаңа инвестициялық саясат жүргізу;
• өнеркәсіпті нығайту;
• агроөнеркәсіп кешенін дамыту;
• көліктік әлеуетті жүзеге асыру;
• тұрғын үй-коммуналдық шаруашылықты жаңғырту;
• кәсіпкерлікті қолдау;
• адами капиталды дамыту;
• парламенттік реформаларды жалғастыру.

Маңызды бастамалар:

Инвесторлардың құқықтарын қорғау үшін Бас прокуратура жанындағы Активтерді қайтару комитеті жаңа мәртебе алып, Инвесторлардың құқықтарын қорғау комитеті болып қайта құрылады.

Экономиканың жоғары технологиялық секторларына Ұлттық қордан 1 млрд АҚШ долларына дейін инвестиция тартылмақ.

2026 жылдың қаңтарына дейін жаңа «Банктер туралы» заң қабылданады. Оның басты мақсаты – нарыққа жаңа қатысушыларды тарту және банктердің өтімділігін нақты секторға бағыттау.

Алматы маңында Alatau city атты жаңа іскерлік белсенділік пен инновациялар орталығы құрылып, онда криптоактивтер арқылы төлем жасау мүмкіндігі бар крипто-фиат арналары енгізіледі.

Ұлттық банкпен бірлесіп, Мемлекеттік цифрлық активтер қоры құрылады. Бұл қадам цифрлық активтердің толыққанды экожүйесін қалыптастыруды жеделдетуге бағытталған.