Өскеменде теннистен дәстүрлі «Kazzinc Open» халықаралық турнирі мәресіне жетті.

Қазанның 23-і күні жалауын желбіреткен ІTF сериясына кіретін бұл додада 18 жасқа дейінгі жас ракеткалар шеберлік байқасты, деп хабарлайды Altaynews.kz тілшісі.

Биылғы жарысқа қазақстандық теннисшілерден бөлек, АҚШ, Австралия, Беларусь, Ресей, Чехия мен Швейцария сияқты елдерден келген барлығы 90-ға жуық спортшы қатысты.

Бұл халықаралық жарыстың тарихы 2010 жылдан бастау алады. Яғни, биыл Өскемендегі «Smash» теннис орталығында осымен 14-ші дода ұйымдастырылды деген сөз. Мұны Қазақстан теннис федерациясының өкілі, биылғы турнирдің директоры Бибарыс Исламов та атап өтті.

Әдеттегідей, бұл жолғы жарыс та «Казцинк» компаниясының демеушілігімен ұйымдастырылғанын айту керек. Осы ретте, жарыстың мәртебесі жылдан жылға артып келе жатқанын да ерекше атап өткен абзал. Мысалы, осыдан бірер жыл бұрынғы дәл осындай жарысқа бүгінгіден екі есе аз спортшы қатысқан екен.

Ал енді турнир қорытындыларына келсек, биылғы додада қыздар арасындағы жекелей сында Дарья Егорова жеңіске жетсе, ұлдар бәсекесінде Ресейдің Химки қаласынан келген Роман Харламовқа тең келер ешкім болмады. Ал жұптар арасындағы жарыста Мәлика Әмірғалиева мен Ариана Гогулинаның (қыздар), сондай-ақ, Александр Даскалович пен Джонас Ханның (ұлдар) жұптары топ жарды.

Турнир соңынан жеңімпаздар мен жүлдегерлер тиісті ұпайларын еншілеп, жалпы рейттингтегі жағдайларын біршама жақсартып қана қоймай, «Казцинк» компаниясы атынан бағалы сыйлықтарға да ие болды.