Риддер ЖЭО: қазандық агрегаттарындағы жөндеу жұмыстары жылу беруге әсер етпейді
Ағымдағы жылдың маусым айынан бастап Риддер ЖЭО-ның қазандық агрегаттарындағы механизмдерді қайта құру және ауыстыру бойынша ауқымды жөндеу жұмыстары жүргізіле бастады.
Риддер жылу электр орталығы бас инженерінің орынбасары Кирилл Голотаның айтуынша, жөндеу жұмыстары қаланы жылумен қамтамасыз етуге әсер етпейді, деп хабарлайды Altaynews.kz тілшісі.
Риддер ЖЭО-да барлығы алты қазандық бар, оның үшеуі – орташа, үшеуі - жоғары қысымда. Бүгінгі таңда қалаға толық көлемде жұмыс істейтін үш орташа қысымды қазандық қызмет көрсетеді.
Кирилл Голотаның бізге берген мәліметінше, екі жоғары қысымды қазандық (№4 және №6) іске қосу-реттеу жұмыстарына дайын. №5 қазандық агрегатында қосалқы механизмді монтаждау жұмыстары аяқталып қалды. Қазандықтар бойынша барлық жұмыстарды 15 желтоқсанға дейін аяқтау жоспарланып отыр.
Ол сондай-ақ қыс мезгілінде толық жұмыс істеу үшін екі орташа қысымды және екі жоғары қысымды қазандықтың жұмыс істеуі жеткілікті екенін, қалған қазандық қондырғылары үнемі резервте болуы керек екенін жеткізді.
Естеріңізге сала кетейік, ЖЭО-ның жөндеу жұмыстарына мемлекеттік резервтен 8 млрд теңге және облыстық бюджеттен шамамен 500 млн теңге бөлінген еді.
Жергілікті тұрғындар кәсіпорын қызметкерлерінің жұмысына оң баға беріп, өткен жылмен салыстырғанда пәтерлердің жылы екенін айтып, ризашылықтарын білдіріп жатыр.
- Аз уақыт ішінде Риддер жылу-электр орталығы қалыпқа келтіріліп, жылу маусымына толық дайындықпен келетініне күмәніміз де болғанын жасырмаймыз, - деп ағынан жарылды тағы бір қала тұрғыны.
Автор: Қуаныш Рахметоллаұлы