ШҚО-да туризм саласындағы «Жылдың үздік кәсіпкерлері-2023» байқауының қорытындысы шығарылды.

Салтанатты шарада демалушыларға жайлы жағдай жасай отырып сапалы қызмет көрсетіп жатқан өңірдегі үздік туристік базалар мен курорт, демалыс үйлерінің иелеріне облыс әкімінің марапаттары мен құттықтау грамоталары табыс етілді, деп хабарлайды Altaynews.kz тілшісі.

Үздік кәсіпкерлерді марапаттаған облыс әкімінің бірінші орынбасары Нұрымбет Сақтағанов туризм саласындағы кәсіпкерлердің ауыр да қызықты жұмыстарын жоғары бағалап, аймақтың туристік әлеуетін арттыруда оларға қашанда қолдау көрсетілетінін жеткізді. Шығыс Қазақстанның тамаша, көркем табиғатына шетелдіктер мен отандастарымызды тартып, тамсандыртып жатқан, өңірдің өркендеп, төрткүл дүниеге танылуына өзіндік үлестерін қосып жатқан іскер жерлестеріміздің кәсібіне жаңа табыстар тіледі.

Шығыстың туристік әлеуетін арттыруға үлес қосып келе жатқан «Бес жұлдыз» ЖШС директоры, «ГастротурШҚО» туристік фирмасының басшысы Мұхтар Тойбазаров, «Meloman Travel» туристік фирмасының иесі Александр Дериглазов, «Алтай Альпісі», «Изумрудный» шипажайының басшысы Александр Чиликин,  «Шале ла Бале» демалыс базасы мен  «The Forest» мейрамханасының басшысы Айдос Бақтыбаев, «Вояж - Алтайский Казахстан» туристік агенттігінің басшысы Ирина Клиновицкая, Катонқарағай ауданындағы «Мұзтау» ЖШС, «Приморск» демалыс базасының басшысы Жанболат Қазанов, «Лаванда» демалыс базасының басшысы Рустам Адамов, «Катонқарағай бұғы паркі» пантамен емдеу орнының басшысы Сәбит Тоқтаров, «Altay OutWear» демалыс киімдері өндірісінің иесі Саят Шаяхметов, Глубокое ауданындағы «Global Invest International» бал-шырын өнімдері өндірісінің иесі Алмас Сетербаев және тағы да 20-дан астам кәсіпкерге облыс әкімінің марапаты табыс етілді.

Жанаргүл Мұқатай