Өскемен қаласында этномәдени бірлестіктерді, шығармашылық ұжымдарды, жастарды және қала тұрғындарын біріктірген үлкен Рождество мейрамы өтті, деп хабарлайды Altainews.kz тілшісі.

Мерекелік бағдарлама облыстық Достық үйінің алаңында ұйымдастырылып, бұл күн түрлі мәдениет пен конфессия өкілдерінің өзара құрметі мен бірлігінің жарқын көрінісіне айналды.

Шараға жиналған жұртшылықты Шығыс Қазақстан облыстық «Халифа Алтай» мешітінің наиб имамы Дәулет Тілеуханұлы құттықтап, игі тілегін жеткізді.

Сахнада «Бастеньки», «Товарки», «Арабеск» секілді қала тұрғындарына жақсы таныс шығармашылық ұжымдар халық әндері мен билерін орындап, көрермендерге көтеріңкі көңіл-күй сыйлады.

Шығыс Қазақстан облыстық славян мәдениеті қоғамының төрағасы Александр Яковлев бұл мерекенің мән-маңызына тоқталды.

Көрермендер ерекше ықыласпен қарсы алған қойылымдардың бірі – «Родная среда» фольклорлық студиясының ежелгі дәстүр – колядканы сахналауы болды. Ряженые көне ырым-жоралғыларды орындап, әнмен амандық, молшылық және қуаныш тіледі.

Мерекелік концертпен қатар көрмелер де ұйымдастырылды. Достық үйінің фойесінде «Ақ үкі» қоғамының қолданбалы өнер бұйымдары және «Рождество дәстүрлері» этнографиялық экспозициясы ұсынылды.

ШҚО архитектуралық-этнографиялық және табиғи-ландшафтық музей-қорығы келушілерге көне иконалар мен сирек кездесетін кітаптарды көрсетті.

Бөлек экспозиция рождество қарсаңдағы бал ашу дәстүріне арналды. Мұнда жастар болашақтарына үмітпен көз салған үлкен айна мен ырымдық заттар қойылды.

Мерекеге келген қала тұрғындары көтеріңкі көңіл-күй мен жылы әсер сыйлаған шараға ризалық білдірді.

Өскеменде өткен Рождество мейрамы халықтың дәстүр мен рухани мұраға деген құрметі қоғамның бірлігі мен құндылықтарын сақтаудың маңызды кепілі екенін тағы бір мәрте дәлелдеді.

Роксана Глыбова

Фото: Махаббат Ахметжанова

Видео: Евгений Щетников