Д.Серікбаев атындағы Шығыс Қазақстан техникалық университеті Еуропалық одақтың ең ірі ғылыми-зерттеу және инновациялық бастамасы саналатын Horizon Europe бағдарламасының конкурстық іріктеуінде жеңіске жетті. Бұл — Қазақстан жоғары оқу орындары арасында алғаш рет иеленген тарихи грант, деп хабарлайды Altainews.kz.

Д.Серікбаев атындағы Шығыс Қазақстан техникалық университетінің халықаралық ғылыми аренадағы жаңа жетістігі ел ғылымының әлеуетін айқын көрсетті. Университет титан мен бериллий ресурстарын кешенді зерттеу, оларды тиімді әрі экологиялық тұрғыдан қауіпсіз өңдеу, сондай-ақ стратегиялық маңызы бар шикізат жеткізу тізбегін дамытуға бағытталған ауқымды жобаға қатысады.

Бұл бастамаға Үлбі металлургия зауыты да серіктес ретінде қосылып, «жасыл» қайта өңдеу технологияларын енгізуге және индустриялық мүмкіндіктерді кеңейтуге үлес қоспақ. Осылайша, Қазақстан өзін тек шикізат жеткізуші ғана емес, ғылымы дамыған, технологиялық тұрғыдан бәсекеге қабілетті сенімді серіктес ретінде дәлелдеп отыр.

Шығыс Қазақстан облысының әкімі Нұрымбет Сақтағанов бұл жетістікті еліміздің ғылыми қауымы үшін үлкен жеңіс деп атап өтті.

Бұл жеңіс – өңірдегі ғылыми мектептердің әлеуетін арттырып қана қоймай, елдің технологиялық тәуелсіздігі мен инновациялық дамуына тың серпін беретін маңызды қадам.

Фото: ШҚО әкімі әлеуметтік парақшасынан