KZ
Өскемен
+19°
ясно жел 7 м/с, С
457.98 490.86 5.26

Ауыл тұрғындарына еуропалық ең озық аппаратпен ота жасайды - ШҚО

Фото: helios-international.com

24.02.2024, 22:20 74 Айна Ескенқызы

«Ауылдық денсаулық сақтауды жаңғырту» ұлттық бағдарламасы аясында Шығыс Қазақстан облысы Алтай ауданының ауданаралық ауруханасына  жыл басында замануи  медициналық «Karl Storz» бейнеэндоскопиялық кешені сатып алынған болатын.

Осы уақыт аралығында кешеннің көмегімен 24 лапароскопиялық ота жасалды. Енді Алтай, Катонқарағай, Үлкен Нарын аудандары, сондай-ақ Серебрянка қаласының тұрғындары да алысқа ат сабылтпай-ақ күрделі оталарды осында жасата алады, деп хабарлайды Altaynews.kz тілшісі.

- “Karl Storz” кешені эндоскопиялық хирургиядағы неміс компаниясының ең озық аппараты, ол гинекологиялық және урологиялық операцияларды өте дәлдікпен және мұқият жүргізуге, хирургиялық өрістің суретін ұсақ бөлшектерге дейін көруге мүмкіндік береді. Жыл басынан бері дәрігерлеріміз 24 лапароскопиялық ота жасады. Оның ішінде лапароскопиялық тәсілмен өтті алып  тастауға 17 операция, қуық асты безіне бірнеше операция жасалды. Лапароскопиялық оталардан кейін асқыну болмайды, науқастар тез оңалып, денсаулығы жылдам қалпына келеді, - деді Алтай ауданаралық ауруханасының бас дәрігері Олжас Нұрекенов. 

64 жастағы Абай Дәулетбаев өтінде тас бар деген диагнозбен түскен екен. 

- Маған емдеуші дәрігерім жаңа аппаратпен ота жасау жөнінде ұсыныс айтты, мен келістім. Ота жасаған күннің ертеңінде жалпы палатаға шығарды. Бұрын  науқастар өтті алып тастағанда ауруханада апталап жататынын еститінбіз. Ота өте жеңіл өтті. Өзімді жақсы сезінемін, - дейді Абай Дәулетбаев. 

 

Сондай-ақ алтайлық дәрігерлер Алексей есімді тағы бір науқастың соқырішегін лапароскопиялық жолмен алып тастаған.

- Маған ешқандай тіліксіз операция жасау туралы айтқанда, келісім бердім. Ота жасаған күннің ертеңінде тұрып, жүріп кеттім. Дәрігерлердің қолы жеңіл екен, риза болдым, - деп бөлісті Алексей. 

 

Осы жабдықтың көмегімен барлық операциялар тегін жүргізілетінін, олар МӘМС есебінен ауыл тұрғындары үшін қолжетімді екенін айта кету керек.

Естеріңізге сала кетейік, Мемлекет басшысы ауыл медицинасын дамыту мақсатында аудандық ауруханаларды, фельдшерлік-акушерлік пункттерді, ауылдардағы отбасылық-дәрігерлік амбулаторияларды «Ауылдық денсаулық сақтауды жаңғырту» ұлттық бағдарламасы аясында заманауи медициналық құралдармен қамтамасыз етуге тапсырма берген болатын.

Біздің Instagram парақшамызға жазылыңыз

Жаңалықтарды ең бірінші болып оқыңыз

жазылу
Кликните на изображение чтобы обновить код, если он неразборчив