Қарттар «Уба» шипажайына алғыс айтты - ШҚО
Шемонаиха ауданын кесіп өтетін Уба өзенінің жағасында Выдриха деген ауыл бар. Сол ауылда «Уба» шипажайы орналасқан. Бұл шипажай Шығыс Қазақстан облысының жұмыспен қамту және әлеуметтік бағдарламаларды үйлестіру басқармасына қарайды.
Шипажай 250 адамды қабылдай алады. Осылай бір жылда 6000 қарт шипажайда ем алып, демалып қайтады, деп хабарлайды Altainews.kz тілшісі.
Шипажайға жуықта барып қайтқан Мәдениет саласының үздігі, Қазақстанның құрметті кітапханашысы Рақия Нұралықызы өзімен бірге демалған барлық қарттардың ризашылығын жеткізіп, меркелік күн қарсаңында алғыс айтуды жөн көріпті.
– Қазір еліміздегі шипажайлардың барлығы ақылы болса, мұнда барлығы тегін. Бұл мемлекет тарапынан қарттарға жасалып отырған үлкен қамқорлық. Мекеменің жалпы емдеу кешенінде табиғи факторлар (емдік батпақ) және климаттық емдеу кеңінен қолданылады. Емдік терренкурлар ұйымдастырған, шипажайда емдеу-диагностикалық кабинеттер бар: массаж, ЛФК, балшық, ингалятор, электрофорез, тұз, нерв жүйелерін қалыпқа келтіретін шунгитпен емдеу орналасқан. Мен «Уба» шипажайында осымен төртінші рет дем алып қайттым. Айтар алғысым шексіз, – дейді Рақия Нұралықызы.
Қазыналы қарттарымыз қай уақытта да қамқорлықта болып, ұрпаққа ризашылық білдірсе, еліміздің болашағы баянды болмақ.
