13 елді мекеннің көшесіне жарық тартылады – Шемонаиха
Фото: el.kz
Биыл Шемонаиха ауданындағы 13 елді мекеннің көшелеріне жарық тартылады. Сонымен қатар бірқатар ауылдың сумен қамту желілеріне жөндеу жүргізіледі.
Бұл туралы аудан әкімінің орынбасары Данияр Уахитов мәлім етті, деп хабарлайды Altainews.kz тілшісі.
– Биыл Убинка және Сугатовка ауылдарында сумен жабдықтау нысандарын салу және реконструкциялау жұмыстары аяқталады. Белый камень, Медведка, Новая Убинка ауылдарында сумен қамту желілеріне ағымдағы жөндеу жүргізу жоспарланған. «Шемонаиха Су арнасы» ЖШС коммуналдық кәсіпорнының су жинау нысандарында 22 есептеу аспабын орнатамыз. Ең бастысы, аталмыш кәсіпорын үшін үш бірлік арнайы техниканы сатып аламыз. Мұның бәрі сумен жабдықтау және су бұруға қатысты апатты жағдайларды қысқа мерзімде жоюға мүмкіндік береді, – деген Данияр Уахитов көшелерді жарықтандыру мәселесіне де тоқталды.
Оның айтуына қарағанда, алдағы уақытта Барашки, Половинка, Березовка, Кенюхово, Сугатовка, Большая речка, Кандыковка, Рулиха, Октябрьское, Медведка, Красная Шемонаиха ауылдарының, сондай-ақ Первомайка кенті мен Шемонаиха қаласының көшелерін жарықтандыру жоспары бар.
Бұған қоса, Медведка және Большая речка ауылдарында жаңа антенна-діңгек құрылыстары салынып, Теле-2 ұялы байланысының жабдықтары орнатылатын болады.
Оқи отырыңыз
