ШҚО-ның Глубокое ауданында гидрологиялық жағдайға тұрақты мониторинг жүргізіп, тәулік бойы кезекшілік ұйымдастыру арқылы тасқынның алдын алу жұмыстары жүргізіліп жатыр, деп хабарлайды Altainews.kz тілшісі.

Ауданның су объектілерінде су деңгейінің көтерілуін анықтау үшін бақылау белгілері қойылған. Тасқын қаупі бар елді мекендерден 9 мың текше метрден астам қар шығарылды. Арықтарды, су өткізу құбырларын тазарту, мұзды механикалық ұсақтау жұмыстары жүргізілді. 12 канал, 49 арық тазартылып, тереңдетілді, 8 көпір, жолдардағы 91 су өткізу құрылысы тазартылды.

Қазіргі уақытта аудан бойынша гидрологиялық жағдай тұрақты. Өзендердегі су деңгейі қатерлі белгілерден төмен.

Десек те, Глубокое ауданында тасқын және еріген су басуы ықтимал 15 елді мекен есепке алынған.

Жағдай күрделене түскен жағдайда жергілікті атқарушы органдар мен азаматтық қорғау қызметі құрылымдарынан 170 адам тартылады, сонымен қатар 144 техника, 2 жүзу құралы, 29 мотопомпа, 100 тонна инертті материал әзір.

Фото: ШҚО ТЖД