«Шығыс» өңірлік қолбасшылығының 6679 әскери бөлімінің және Қылмыстық атқару жүйесі департаментінің қызметкерлері түзеу мекемелерінің аумағына тыйым салынған заттарды алып өтуді көздеген екі қылмыстың  жолын кесті, деп хабарлайды Altainews.kz тілшісі.

Қазақстан Республикасы Ішкі істер министрінің тапсырмасы және «Заң және тәртіп» қағидатын жүзеге асыру аясында Қылмыстық атқару жүйесі нысандарын қорғау мен бақылау іс-шаралары ел көлемінде күшейтілген болатын. Бұл өз кезегінде сотталғандарға арналмаған заттарды өткізуге бағытталған құқыққа қайшы әрекеттерді алдын ала анықтап, жедел тоқтатуға мүмкіндік берді.

Тыйым салынған заттарды жеткізуге бағытталған екі әрекет те Ұлттық ұлан мен ҚАЖ қызметкерлерінің кәсіби және үйлесімді жұмысының арқасында дер кезінде тоқтатылды. Аталған деректер бойынша барлық материалдар әрі қарай қарау және процессуалдық шешім қабылдау үшін құзырлы органдарға тапсырылды.

Ұлттық ұлан қызметі түзеу мекемелерінде құқық бұзушылықтардың алдын алу, сотталғандардың қауіпсіздігін қамтамасыз ету және еліміздегі заңдылық пен тәртіпті нығайту бағытында жұмыстарды жалғастыра береді.

Фото: ҚР ҰҰ баспасөз қызметі