Өскемендік автотасымалдаушы Кәсіпкерлер палатасынан көмек сұрады
Салық органдары Өскемендегі «Вебас» кәсіпорнына корпоративтік табыс салығы мен қосылған құн салығының сомасын төмендетіп көрсетіп отырғаны туралы хабарлаған. Тасымалдаушы мұнымен келіспей, ШҚО Кәсіпкерлер палатасынан жәрдем сұрап отыр, деп хабарлайды Altainews.kz тілшісі.
ШҚО Кәсіпкерлер палатасында бұл өтінішті салық және прокуратура органдары бірлесе қарады.
ШҚО бойынша Мемлекеттік кірістер департаменті өкілдерінің айтуынша, Өскемен қаласы ТҮКШ, жолаушылар көлігі және автомобиль жолдары бөлімінің ай, тоқсан сайын тасымалданған жолаушылар саны мен салық төлеушінің салық есептілігін салыстыру кезінде кәсіпкердің сомаларды төмендеткені анықталған.
«Вебас» ЖШС өкілі кәсіпорын жолаушылардан қолма-қол ақша түрінде алынған кірісті ғана есепке ала алады деп мәлімдейді. Қолма-қол ақшасыз төлем банкке және ТҮКШ бөліміне кетеді, олар осының негізінде субсидия төлейді.
Сыбайлас жемқорлыққа қарсы комитет барлық мән-жайды анықтауға дайын екенін білдірді.
Айта кету керек, Өскеменнің әлеуметтік маңызы бар маршруттарына қызмет көрсететін басқа тасымалдаушылар да салық органынан осындай хабарлама алған.
Кеңес қорытындысы бойынша ШҚО бойынша Мемлекеттік кірістер департаментіне «Вебас» ЖШС-ға қатысты әкімшілік рәсімді тоқтату мүмкіндігін қарастыру ұсынылды.
Фото: ШҚО кәсіпкерлер палатасы