Бүгін Қазақстан халқы Ассамблеясы жыл сайын дәстүрлі түрде ұйымдастыратын «Бірлік» жастар лагері өз жұмысын бастады. Халықаралық жастар лагеріне этномәдени бірлестіктер мен жастар ұйымдарының белсенді жастары қатысуда.
Еліміздің түкпір-түкпірінен жиналған жастар мен Қытай, Моңғолия және Өзбекстаннан келген қандастар бұл жолы Шығыс Қазақстан облысы Алтай ауданындағы «Балақай» спорттық-сауықтыру орталығында бас қосты, деп хабарлайды Altainews.kz тілшісі.
Қазақстан халқы Ассамблеясында жастарға арналған түрлі жобалар жүзеге асырылады. Соның бірі – «Бірлік» халықаралық жастар жобасы. Жобаның мақсаты - этникалық жастар арасындағы достықты нығайтуға жәрдемдесу, мәдени әртүрлілік қағидаттарына негізделген жастар қауымдастығын дамыту.
- Еліміздің түкпір-түкпірінен және шет мемлекеттерден 60-қа жуық жастар жиналды. Шығыс Қазақстан еліміздегі ең көрікті өңірлердің бірі болғандықтан биыл халықаралық жобаны осы облыста өткізетін болып шешім қабылдадық. Негізі «Бірлік» лагері 10 жылдан бері түрлі облыста ұйымдастырылып келеді. Мәселен, былтыр Алматы облысында ұйымдастырғанбыз. Ондағы негізгі мақсатымыз - жастарға еліміздің әсем табиғатын таныстыру, көрсету, қоғамдық келісімді насихаттау. Осы арқылы Қазақстан халқы Ассамблеясының жаңа пулын және жаңа тұлғалар қалыптастырмақпыз, - дейді ҚР Мәдениет және ақпарат министрлігі Этносаралық қатынастарды дамыту комитетінің «Қоғамдық келісім» РММ сарапшысы Еламан Елемес.
Лагерге жыл көлемінде белсенді жұмыс істеп, ерекше көзге түскен жастар жиналады. Жоба шарты бойынша 18 бен 26 жас аралығындағы, осыған дейін осы титегі Ассамблея лагеріне қатыспаған жаңа жастар болуы шарт.
- Дәстүрлі «Бірлік» лагеріне Ұлытау облысы Жезқазған қаласынан келіп қатысудамын. Өңірлік Ассамблеяда белсенді жастардың бірі болғандықтан Шығыс Қазақстанға келу мүмкіндігі берілгеніне шын жүректен қуаныштымын. Мұнда қатысудағы негізгі мақсатым – мемлекеттік тілді дәріптеу. Өзім мемлекеттік тілді 2-3 сыныптан бастап меңгере бастадым. Қазақстанда тұрып жатқандықтан осында тұратын әрбір азамат қазақ тілін білуі, оны құрметтеуі парыз деген пікірдемін. Уақыт өте келе халқымыздың дәстүріне, өнеріне деген қызығушылық туындап домбыра үйрене бастадым. Бүгінде осы өнер жолында, яғни музыкалық колледжде білім алудамын, - дейді Аркадий Побединский.
Үш күнге жоспарланған лагерь бағдарламасы жастардың әлеуетін дамытуға бағытталып, оның аясында пікірталас алаңдары, оқыту тренингтері, мотивациялық кездесулер, спорттық және мәдени-бұқаралық іс-шаралар ұйымдастырылады. Сондай-ақ мәдени, спорттық-туристік шаралар да жоспарланған.
