Шығыс Қазақстан облысы Тарбағатай ауданының Асусай ауылында жаңа медициналық пункттің құрылысы аяқталып келеді. Бұл жоба «Ауылдық денсаулық сақтауды жаңғырту» мемлекеттік бағдарламасы аясында жүзеге асырылды. Жаңа медпункт 256 тұрғыны бар ауылдағы жалғыз емдеу мекемесі болмақ, деп хабарлайды Altainews.kz.

Бұған дейін ауылдағы медпункт 1983 жылы салынған ғимаратта орналасқан еді. Ол заманауи талаптарға сай келмейтін және қажетті жағдайлар болмайтын. 2024 жылдың мамыр айында басталған жаңа медпункттің құрылысы толығымен аяқталды, барлық қажетті инженерлік инфрақұрылымдар жүргізілді. Құрылыс жұмыстарын орындаған «KAZPROFSTROY HOLDING» ЖШС қазіргі уақытта ғимараттың айналасын абаттандыру жұмыстарын жүргізуде.

Асусай тұрғындары көптен күткен медпункттің ашылуын асыға күтуде. Мұнда 34 жылдық еңбек өтілі бар тәжірибелі мейірбике жұмыс істейтін болады. Енді ауыл тұрғындары дәрігерге бармай-ақ, жергілікті медпунктте бастапқы медициналық қызметтерді толық көлемде ала алады.

Жыл соңына дейін Шығыс Қазақстан облысында тағы үш медициналық пункт ашылады, оның бірі - Алтай ауданының Феклистовка ауылындағы медпункт.