Шығыста өнер көрсеткен "Отырар сазы" оркестрі аншлаг жинады
Өскеменде аңызға айналған Нұрғиса Тілендиев атындағы Қазақ мемлекеттік академиялық фольклорлық-этнографиялық "Отырар сазы" халық аспаптары оркестрінің кеші аншлагпен өтті, деп хабарлайды Altainews.kz тілшісі.
Республика күніне орай қасиетті Шығыс өңіріне Алатаудың бөктерінен әсем қала Алматының сәлемін ала келген "Отырар сазы" оркестрі ерекше қошеметке бөленді.
- Шығыс Қазақстан облыстық филармониясының сахнасында жеке орындаушы ретінде алғаш рет өнер көрсетуім. Залдың лық толы болуы көңілге қуаныш пен қобалжуды қатар ұялатып отыр. Киелі Шығыс өңірінде классикалық музыканы бағалаушылардың қатары артып келеді, - деді Абай атындағы Қазақ ұлттық опера және балет театрының солисі Фархат Кулиев.
"Отырар сазы" оркестрінің бас дирижері және көркемдік жетекшісі — оның негізін қалаушы, композитор Нұрғиса Тілендиевтің қызы Дінзухра Тілендиева түрлі аспаптарды үйлестіре ойнату арқылы көрермендерге әуезді күймен қазақтың нағыз болмысын танытқандай әсер қалдырды.
- Қазақтың классикалық өнерін әлемдік сахнада шырқатып жүрген "Отырар сазы" оркестрінің және классикалық әншілеріміздің, Дінзухра Тілендиеваның дирижерлігін тамашалап, рухани шабыт алдық, - деді көрермен Әлия Қилымбекқызы.
Ақерке Рағызбаева
Оқи отырыңыз
