Глубокое ауданына қарасты Степное ауылында ауыз су мәселесі ұзақ жылдар бойы өзекті болып келген еді. Себебі ауылдық су құбыры 1974 жылы салынған, ал желілердің тозу деңгейі 100 пайызға жеткен. Тиісті жөндеу жұмыстарының болмауы тұрғындардың тұрмыс сапасына айтарлықтай әсер етті,- деп хабарлайды Altainews.kz тілшісі ШҚО энергетика және тұрғын үй-коммуналдық шаруашылық басқармасына сілтеме жасап.

2022 жылы бұл мәселені шешу үшін арнайы жоба әзірленді. «VK ETNA» ЖШС әзірлеген жобаның жалпы құны 808,820 млн теңгені құрады. Жоба шеңберінде су құбыры жүйесін толық жаңғырту, жаңа инфрақұрылым салу және ауыл тұрғындарын тұрақты сапалы ауыз сумен қамтамасыз ету жоспарланды.

Жобаның негізгі құрамдас бөліктері:

• Бірінші және екінші көтергіш сорғы станцияларын салу;
• Сыйымдылығы 100 м³ болатын екі таза су резервуарын орнату;
• 16,99 км ұзындықтағы су құбыры желісін жаңғырту, оның ішінде тұрғын үйлерге су жеткізу желілерін салу;
• 71 кВт қуатты трансформаторлық қосалқы станцияны орнату.

Құрылыс жұмыстары бойынша келісімшарт «Альянс XXI» ЖШС-мен жасалып, 2023 жылы жұмыстар басталды. Ағымдағы жылы жобаны аяқтауға республикалық және жергілікті бюджеттен 441,96 млн теңге бөлінді.

2023 жылдың 8 сәуірінен бастап мердігер ұйым су құбыры жүйесін жаңғырту жұмыстарын бастап, барлық жұмыстарды толық көлемде аяқтады. Қазіргі уақытта пайдалануға беру актісі дайындалу үстінде.

Бұл жоба ауылдың 829 тұрғынын кепілді түрде сапалы ауыз сумен қамтамасыз етуге мүмкіндік берді. Жаңартылған сумен жабдықтау жүйесі ауыл тұрғындарының тұрмыс сапасын арттырып, олардың денсаулығы мен тұрмыстық қажеттіліктерін тиімді қанағаттандыруға ықпал етуде.

Аталған жоба елді мекендерде инфрақұрылымды дамыту бағдарламасының сәтті жүзеге асқан үлгісінің бірі болып табылады. Тұрғындар енді таза ауыз суға қол жеткізіп, тұрмыстық және шаруашылық қажеттіліктерін тиімді әрі сапалы түрде қамтамасыз ете алады.