Дарындылық пен қосымша білім беруді дамытудың Шығыс Қазақстан ғылыми-әдістемелік «Дарын» орталығы «Хабар» телеарнасымен бірлесіп ҚР Оқу-ағарту министрлігінің қолдауымен 11 сынып оқушылары арасында «XXI ғасыр көшбасшысы» зияткерлік сайысының облыстық кезеңін өткізді, деп хабарлайды  Altainews.kz  тілшісі.

Дарындылық пен қосымша білім беруді дамытудың Шығыс Қазақстан ғылыми-әдістемелік «Дарын» орталығының директоры Гаухар Рахымжанованың айтуынша, жаңа форматтағы сайыстың мақсаты – оқушыларды білімге ынталандыру, жоғары зияткерлік қабілеті бар, дайындығы жақсы әрі дарынды оқушыларды іріктеп, қолдау арқылы еліміздегі жастардың интеллектуалдық әлеуетін қалыптастыру.

Зияткерлік сайысының облыстық кезеңіне өңірдің білім беру ұйымдарының 11 сыныптарында оқитын 30-дан аса оқушы, яғни  аудандық, қалалық кезеңдердің жеңімпаздары қатысты.

Сайыс екі айналымнан тұрды, алғашқы айналымда қатысушылар тест тапсырса, екінші айналымда – блиц-турнир өтті.

Қатысушылар I айналымда жалпы білімге, логикаға, сондай-ақ түрлі салалардағы интеллектуалдық қабілеттерге, музыка, өнер және спорт бойынша тест сұрақтарын шешті.

II айналымдағы ауызша турға жоғары ұпай жинаған 12 қатысушы өтті. Бұл кезеңде оқушылар ғылымның әртүрлі саласынан сұрақтарға жауап беріп, бақ сынасады. Бұл айналымда оқушылар өздерінің ойлау қабілеттерін, жылдам жауап беру шеберліктерін көрсетті.

Зияткерлік сайысының қорытындысы бойынша 19 қатысушы жүлдегер атанды. Оның ішінде I орын - 5, II орын - 7, III орын - 7 оқушы.

Екінші айналымның қорытындысы бойынша үздік 5 қатысушы анықталып, «XXI ғасыр көшбасшысы» зияткерлік сайысының республикалық кезеңіне жолдама алды.

Олар – дарынды балаларға арналған Жамбыл атындағы облыстық мамандандырылған мектеп-гимназия-интернатының оқушысы Мөлдір Қабылғазы, дарынды балаларға арналған облыстық мамандандырылған мектеп-лицей-интернатының оқушысы Меруерт Қайратбекқызы, дарынды балаларға арналған мамандандырылған «Білім Инновация» лицейінің оқушысы Абылайхан Айткешов, Солдатово орта мектебінің оқушысы Бекжан Қасым және Н.Островский атындағы №4 Күршім орта мектебінің оқушысы Ерасыл Ерліков.

Сайыстың жүлдегерлері мен жеңімпаздары арнайы дипломдармен марапатталды.  

Айжанат Бақытқызы