Бүгін ҚР Парламенті Мәжілісінің депутаты Ержан Бейсенбаев Шығыс Қазақстан облысына жұмыс сапарымен келіп, облыс орталығындағы бірқатар нысандардың тыныс-тіршілігімен танысты, деп хабарлайды Altainews.kz тілшісі.

Депутат арнайы келген орталықтың бірі – Өскемен қаласындағы «Страна чудес» аутизм спектрі бұзылған балаларға арналған мамандандырылған мектеп-балабақшасы.

Аталған мектеп-балабақша ерекше қажеттіліктері бар балаларға көмек көрсету саласындағы маңызды орталықтардың бірі. Бұл мекеме аутизм спектрі бұзылған балаларға сапалы білім мен қолдау көрсетіп, оларды қоғамға бейімдеу мен әлеуметтендіру процесінде үлкен рөл атқарады.

Орталық директоры Лилия Мамбурованың айтуынша, мектеп-балабақша арнайы бағдарлама бойынша жұмыс істейді. Балалардың жеке ерекшеліктеріне сәйкес оқыту әдістемесі мен тәсілдері таңдалып, әр балаға арнайы мамандар тарапынан психологиялық, педагогикалық және медициналық көмек көрсетіледі.

Қазір балабақшада 72 бала, мектепте 74 бала оңалту қызметтерімен қатар білім алады. Әзірге мұнда бастауыш сыныптары ғана бар. Орта буын сыныптарына арналған қосымша ғимаратты алдағы 1-қыркүйекте ашуды жоспарлап отыр.  

Мекемеде балалардың дамуына қолайлы жағдай жасалған. Мұнда балалардың моторикасын дамыту, коммуникативті дағдыларын жетілдіру, эмоционалдық жағдайларын реттеу, әлеуметтік қарым-қатынастарды қалыптастыру бойынша түрлі әдістер қолданылады. 

Оқу бағдарламалары балалардың жеке қажеттіліктері мен мүмкіндіктеріне сай икемделеді, бұл олардың оқу үдерісіне қатысуын жеңілдетеді және жан-жақты дамуына мүмкіндік береді.

Мектеп-балабақшасында жоғары білікті мамандар оңалту қызметтерін көрсетеді. Олардың арасында логопед, дефектолог, сенсорлық интеграция, психолог және арнайы педагогтар бар. Барлық мамандар арнайы оқулар мен курстардан өткен, олар балалармен жұмыс істеудің ең тиімді әдіс-тәсілдерін пайдаланады. 
Оңалту қызметінде орталық заманауи әдістерді және авторлық оқу бағдарламасын қолданады.

Балалар  жасына және бейіміне қарай топтарға бөлінген. Топтық сабақтар барысында оқу сауаттылығы мен математика, қазақ тілі сияқты негізгі пәндермен қатар музыка, денешынықтыру және шығармашылықпен айналысады.

Орталықтың жұмысымен танысып, ұжым қызметкерлерімен, балалардың ата-аналарымен әңгімелескен Ержан Бейсенбаев  орталықтың қызметін жоғары бағалап, ризашылығын білдірді.
Ата-аналар тарапынан айтылған ұсыныстар тиісті орындарға жеткізілетіндігін және осы ұсыныстарды Парламенттің ресми сайтына жазбаша жолдау қажеттігін айтты.

Депутат жұмыс сапарымен Шығыс өңірлік қолбасшылығының 5518 әскери бөлімінде де болды. 

Айжанат Бақытқызы

Фото: Махаббат Ахметжанова

Видео: Жәнібек Ырысбай