Өскеменде тағы бір ерекше спорттық іс-шара өтіп жатыр. Бүгін облыс орталығындағы Комсомол аралында шаңғымен жүгіруден «Шаңғы жолы шақырады» деп аталатын дәстүрлі сайыс басталды, деп хабарлайды Altainews.kz тілшісі.

Өскемен қаласы әкімдігінің мұрындық болуымен ұйымдастырылған жарысқа шаһардағы мектептердің оқушылары қатысуда. Олардың арасында бұл спорт түріне енді ғана ден қойғандармен қатар, шаңғымен жүгіруден бірталай жетістікке жетіп үлгерген тәжірибелі спортшылар да бар. Республикалық додаларда облысымыздың намысын қорғап жүрген саңлақтар да осында. Солардың бірі – Алексей Кузнецов. Бүгінде қаладағы 4-ші мектепте оқитын Алексейдің еншісінде бірнеше республикалық жарыстың жүлдесі бар.

Жарыстың бас төрешісі Леонид Саковскийдің айтуынша, сайыс өте қызықты әрі тартысты болайын деп тұр. Себебі, қатысушылар жас санатына қарай бірнеше топқа бөлініп, өзара мықтыны анықтайтын болады.

Айта кетейік, бір күнге созылатын жарыс қорытындысы бойынша жүлделі орындарға ие болған қатысушылар ұйымдастырушылар атынан медальдар мен сыйлықтарға ие болмақ.

Видео: Евгений Щетников