Халық Қаһарманы Қасым Қайсенов атындағы 27943 әскери бөлімінің сарбаздары 8 наурыз – Халықаралық әйелдер күніне орай ұйымдастырылған «Анама хат» атты облыстық челленджге өз үлестерін қосуды жөн көрді, деп хабарлайды Altainews.kz тілшісі.

Шығыс Қазақстан облысында аналар мен әжелерге деген сүйіспеншілік пен құрметті көрсету мақсатында 24 ақпан – 4 наурыз аралығында челлендж ұйымдастырылды. Оған мектеп оқушылары, студенттер және аймақ жастары белсенді қатысты.

Отбасылық құндылықтардың маңызын атап өтіп, ұрпақтар арасындағы байланысты нығайтуды көздеген бұл іс-шара цифрлық дәуірде ерекше маңызға ие болды. 27943 әскери бөлімі басшылығының айтуынша, челленджге қатысу сарбаздарға тек дәстүрді еске салып қана қоймай, әскери қызмет пен отбасы арасындағы байланысты нығайтуға мүмкіндік берді.

Челлендж шарты бойынша кез келген адам анасына хат жазып немесе бейнеролик түсіріп, өз алғысын білдіре алды. Әскери қызметшілер қағазға хат жазуды таңдады. Көптеген сарбаздар үшін бұл олардың өміріндегі алғашқы қағазға түсірілген шынайы хат болды.

Шын мәнінде, заманауи цифрлық коммуникация үстемдік еткен заманда қолмен жазылған хат – шынайылықтың, жылылықтың және адами қарым-қатынастың белгісі.

«Анама хат» челленджі жақындарға деген сүйіспеншілік пен құрметтің заманауи технологиялармен үйлесімді ұштасатынын дәлелдейді. Шығыс Қазақстан облысының әскери қызметкерлері бұл челлендж арқылы қызмет жағдайында да отбасылық дәстүрлерді сақтаудың және жақын жандарға қамқорлық танытудың маңызын көрсетті.

Дамир Омаров

Фото/видео: Данияр Сағидолдин