Риддер қаласының орталығында ерекше арт-нысанның құрылысы аяқталды. Бұл ­– пластикалық бөтелкелерден жасалған биіктігі 2,5 метрлік және ені 1,5 метрден асатын қызғалдақ бейнесіндегі ваза. Экологиялық тұрғыдан маңызды бұл арт-нысан көпшілікке Наурыз мейрамы аясында ұсынылып, мерекелік серуендер мен фотозонаның басты сәніне айналмақ.

Бұл арт-нысанның құрылуы экология мәселесіне назар аударуды мақсат етеді. Пластикалық бөтелкелерді шығармашылық қайта өңдеу арқылы экологиялық жауапкершілікті арттыруға мүмкіндік тудырумен қатар, қазақтың ұлттық дәстүрлерін заманауи экологиялық бастамалармен ұштастыру көзделген. Арт-нысанның басты тақырыбы – Наурыз мейрамы. Бұл ­– табиғаттың жаңаруын, жаңа жылдың басталуын білдіретін қазақ мәдениетіндегі маңызды кезең.

Наурыз мейрамын тойлауға арналған бұл арт-нысан қазақтың бай мәдени мұрасын паш етіп, пластикалық бөтелкелерден өнер туындысын жасау арқылы экологиялық мәселелерге назар аударды. Пластикалық қалдықтарды қайта өңдеу, сондай-ақ оларды жаңа әрі шығармашылық тұрғыдан пайдаланудың мүмкіндіктері көрініс тапты. Бұл жобаның тағы бір маңызды аспектісі – қазақ мәдениетін қазіргі заманның экологиялық және технологиялық талаптарымен үйлестіру.

Жобаның экологиялық мәні зор, себебі ол пластикалық қалдықтар мәселесін шешуге көмектеседі. Әсіресе, қала тұрғындарының осы іске қатысуы өте маңызды. Сонымен қатар жоба әлеуметтік жағынан да өзекті, ол табиғатты қорғау мен мәдени құндылықтарды сақтау идеясын біріктіру арқылы қоғамды біріктіруге бағытталған. Арт-нысан қоғамдық кеңістікте адамдарды біріктіріп, табиғатқа деген құрметті арттыруға ықпал ететін интерактивті алаң ретінде қызмет ететін болады.

Қазіргі кезде арт-нысан толық әзір, Наурыз мейрамына арналған мерекелік шараларда қонақтарды қарсы алуға дайын тұр. Ұйымдастырушылар барлық қала тұрғындарын көрмеге келіп, осы керемет арт-нысанда естелік суреттер түсіруге шақырады. Экологиялық мәдениетті дамыту мен дәстүрлерді сақтау бағытында жасалған бұл жобаның маңызы орасан.