Шығыс Қазақстан облысының әкімі Нұрымбет Сақтағанов су тасқыны қаупі жоғары аумақтарға – Катонқарағай және Алтай аудандарына әуе шолуын жүргізді. Жедел штаб мамандарымен бірге өзендер, су қоймалары мен қар жамылғысының жай-күйіне мониторинг жасалды, деп хабарлайды Altainews.kz тілшісі ШҚО әкімінің баспасөз қызметіне сілтеме жасай отырып.

Қар қоры белгіленген нормадан 10-20%-ға артық. Алтай қаласы маңында қар қалыңдығы 100 см-ге жетсе, таулы аймақтарда 2,5 метрден асады. Бұл өңірлердегі су қоры шамамен 500 мм. Катонқарағай ауданында қар биіктігі 30-50 см шамасында, су қоры – 100 мм.

Сонымен қатар облыс әкім Катонқарағай ауданындағыполиция, әкімдік, прокуратура мен сот ғимараттарын аралады. Бұл нысандарда күрделі жөндеу жұмыстары аяқталған. Сондай-ақ проблемалық нысандардың бірі – Дене шынықтыру-сауықтыру кешеніне барды. Мұнда құрылыс-монтаж жұмыстарының 75%-ы аяқталған, техникалық қадағалау анықтаған ақауларды мердігер жоюда. Нысанда жылыту және желдету жүйелерінің монтажы толық аяқталған. Бұл кешен белгіленген кестеге сәйкес пайдалануға беріледі.

Облыс әкімі аудан әкімдеріне әлеуметтік маңызы бар нысандардың құрылысын үнемі бақылауда ұстауды тапсырды.