Өскеменде жерлестері халықаралық жарыстардан жүлдемен оралған жас спортшы Зейнеп Құмарқанды зор қошеметпен қарсы алды. Азия ойындары мен әлем чемпионатында ел намысын қорғаған 19 жастағы шорт-трекшіге жанкүйерлер гүл шоқтарын ұсынып, алғыстарын білдірді, деп хабарлайды Altainews.kz тілшісі.

Қазақтың намысын арқалаған ару үш ай бойы елден жырақта шетелдік жарыстарда бақ сынады. 2024 жылдың желтоқсанында Канададағы Квебек қаласында өткен Әлем кубогының кезеңінде аралас эстафетада (2000 м) күміс медаль жеңіп алып, 500 м қашықтықта да күміс жүлдеге ие болды. Ал ақпан айында Қытайдың Харбин қаласында өткен IX Қысқы Азия ойындарында әйелдер құрамасымен бірге 3000 метрлік эстафетада тағы бір күміс медаль иеленді. Сондай-ақ Калгари қаласында (Канада) өткен жасөспірімдер арасындағы әлем чемпионатында әйелдер эстафетасында күміс, аралас эстафетада қола жүлде еншіледі.

Осылайша, жас қазақстандық шорт-трекші Азия ойындары, жасөспірімдер Кубогы және әлем чемпионатында барлығы 5 халықаралық медаль жеңіп алды. Бұған қоса, Астанада өткен спартакиадада 500 метрге жүгіруден алтын медаль алып, жалпы есепте әйелдер арасында 2-орын иеленді.

Зейнеп конькимен кәсіби түрде айналысып жүргеніне 10 жыл болған. Оны алғаш конькиге үйреткен – нағашы атасы, ал шорт-трекке баулыған – әкесі.

Қазір Зейнеп Құмарқан – Қазақстан шорт-трек құрамасының болашағынан үміт күттіретін спортшыларының бірі. Енді ол Олимпиада ойындарына дайындықты бастап, лицензия үшін таласуға ниетті. Бірақ әзірге Олимпиада құрамасына енетіні немесе енбейтіні белгісіз.

Фото: Жібек Нұрахмет

Видео: Жәнібек Ырысбай