Шығыс Қазақстан облысында жылыту маусымы барысында 276 өрт оқиғасы тіркелді, деп хабарлайды Altainews.kz тілшісі. 

ШҚО Төтенше жағдайлар департаментінің мамандары өрттің негізгі себептері ретінде электр жабдықтарын дұрыс пайдаланбау, отпен абайсыз әрекет жасау және пештерді қолданудағы немқұрайдылықты атап өтті. Сонымен қатар қауіпсіздік ережелерін сақтамай күлді жою салдарынан тұрғын үйлерде өрт жиі орын алған.

Жылыту маусымындағы өрттердің салдарынан 18 адам қайтыс болып, 21 адам улы газдан зардап шекті. Өрттің алдын алу мақсатында ШҚО құтқарушылары тұрғындар арасында кең көлемді түсіндіру жұмыстарын жүргізуде. Бүгінге дейін 146 000-ға жуық үй қамтылып, өрт қауіпсіздігі талаптарының сақталуын тексеру барысында 33 000 үйден заң бұзушылық анықталды. Ал құтқарушылардың алдын алу шараларының нәтижесінде 44 000 үйдегі өрт қауіпсіздігіне қатысты кемшіліктер жойылды.