ҚР Президентінің Жарлығына сәйкес ел көлемінде көктемгі әскерге шақыру науқаны басталды. Жастар Шекара қызметі, Қарулы күштер, Ішкі әскер, Төтенше жағдайлар қызметі және Мемлекеттік күзетке жіберіледі, деп хабарлайды Altainews.kz тілшісі.
Бүгін ШҚО Қорғаныс істері жөніндегі департаменті баспасөз өкілдеріне әскерге шақыру және медициналық тексерістен өту тәртібін таныстырды. Аудандар мен қалалардан келген болашақ сарбаздардың құжаттары осы департаментте қаралады. Жастардың психологиялық дайындығы «Ақсұңқар» компьютерлік жүйесі арқылы бағаланады.
— Үш кезеңдік тест бар. Бірінші тест – 91, екіншісі – 38, ал үшінші кезеңде 291 сұраққа жауап беру қажет. Жалпы, 400-ге жуық сұрақтың нәтижесіне қарай жас сарбаздардың дайындығы анықталады. Бұл процеске негізгі психологпен қатар қосымша мамандар да қатысады, — деді тәрбие және идеологиялық жұмыстар басқармасының бастығы, майор Жасұлан Сатбалдиев.
Қазіргі таңда жергілікті әскери басқарма органдары шекара қызметі бойынша жоспарды орындады. Шекара бекеттеріне, атап айтқанда, Күршім мен Зайсанға жүзге жуық азамат жіберілді.
— Әскерге шақыру екі кезеңге бөлінген. Бүгін, наурыздың соңғы күнінде, 20-ға жуық азаматты шығарып саламыз. Келесі топ 3 сәуірде жөнелтіледі. Қазіргі уақытта шақырылушылар медициналық комиссиядан өтіп, психологиялық жағдайы тексеріліп жатыр. Сондай-ақ әскери бөлім өкілдерімен жеке сұхбат ұйымдастырылуда, — деді майор Жасұлан Сатбалдиев.
Бүгінгі медициналық және психологиялық тексеруден өткен жастар Қонаев қаласындағы №32363 әскери бөліміне аттанады.
— Әскер мықты әрі өзіне сенімді азаматтарды тәрбиелейді. Әр шақырылушының психологиялық тұрақтылығына ерекше назар аударылады. Аудандық және облыстық медициналық комиссиядан кейін жас сарбаздар қосымша тестілеуден өтеді. Оның нәтижесі, жеке әңгімелесулер және әлеуметтік жағдайына байланысты жас сарбаздың әскери ортаға бейімделу деңгейі анықталады, — деді ШҚО Қорғаныс істері жөніндегі департаментінің офицер-психологы Әдемі Сейтқанова.
— 1414-тен әскерге шақырылғаным туралы хабарлама алдым. Аудандық және облыстық медициналық тексерістен өттім. Бала күнімнен аспанға құмар едім, енді десанттық шабуыл бригадасына баратыныма қуаныштымын әрі дайынмын, — деді болашақ сарбаз Ерасыл Көрпебаев.
Департамент қызметкерлерінің айтуынша, әскерге баруға ниетті жастардың саны жыл сайын артып келеді. Әскерден оралған азаматтар арнайы оқу орындарына түсуге мүмкіндік алып, кейбір әлеуметтік жеңілдіктерге ие болады, соның ішінде екінші деңгейлі банктердегі берешектерін өтеу жеңілдіктері қарастырылған.
Айдос Мырзахметов
Фото: Жәнібек Ырысбай
