Өскемен қаласының әкімі Алмат Ақышов баспасөз қызметкерлеріне «2025 жылдың бірінші тоқсан қорытындысы және Өскемен қаласының болашақ дамуы» атты брифинг өткізіп, Шығыстың бас шаһарына қатысты жоспарлары мен жобаларын таныстырды, деп хабарлайды Altainews.kz тілшісі. 

Қаланың қолданыстағы бас жоспары 2017 жылы жасалған болса, бүгінгі таңда түзету қажеттілігі туындап отыр. Брифингте белгілі болғандай, орталық көшелерді абаттандыру жобалары, ғимараттардың қасбеттерін бояу, кіреберіс элементтерін реттеу, кедергісіз орта құру, кіріктірілген нысандардың маңдайшаларын ретке келтіру сынды жұмыстар қарастырылған.

Атап айтқанда, дамуы қарқынды жүзеге асырылатын өңірлерге 22, 24, 26-шы ықшам аудандары кіреді. 22-ші тұрғын ауданда 9 302 пәтерге арналған 110 көпқабатты тұрғын үйдің құрылысы қарастырылған. Жалпы тұрғын үй қорының ауданы 902,9 мың шаршы метрді құрайды.

24-ші тұрғын ауданда 92 көпқабатты тұрғын үйдің салу жоспарланған, онда 11 715 пәтер немесе 1 337,4 мың шаршы метр тұрғын үй пайдалануға беріледі. 26-тұрғын ауданда 75 көпқабатты тұрғын үйдің құрылысы жүріп жатыр, оның жалпы ауданы 657,8 мың шаршы метр болатын 8 128 пәтерді қамтиды.

26-тұрғын шағын ауданда есу каналы салынады. Жоба дайын. Құны 27 миллиард теңге соманы құрайды.

Көлік инфрақұрылымы

Болашақта Виноградова көшесіне жалғасып көпір салынады. Жобалау жылдың соңында аяқталады. Құрылыс жұмыстары келесі жылы басталады. Бұдан бөлек, Үлбі өзеніне де көпір салынады.

Өскемендіктерге мәлім, Сәтпаев, Жібек жолы көшелеріндегі жол айрықтарымен жұмыстар басталып кетті. Брифингте белгілі болғандай, қалада бір емес, екі жол айрығы салыну көздеген.

Көлемді спорттық нысандар тұрғызылады

Өскеменде ипподром салынатыны туралы талай мәрте жарияланған болатын. Ат үстіндегі азаматтардың сұранысы биыл қанағаттандырылды.

Шығыстың бас шаһарында өз «Алтай аренасы» болады» дегелі ықылым заман өтті. Брифингте бас спорт нысанының он тоғызыншы шағын ауданда орналасатыны және жұмыс барысы белгілі болды. Қала басшысының баяндамасына сенсек, ауқымы жағынан қалада болмаған қайталанбас нысанға айналады.

Бұдан бөлек, Алмат Талғатұлы Президент тапсырмасымен тенниис кортының жобалау жұмыстары жатқанын хабардар етті. Жобалау аяқталғаннан кейін құрылыс басталады.

Қала тұрғындары мен қонақтарына қоғамдық кеңістік құру

Облыс әкімі тапсырмасына орай Горький көшесі мен Қазақстан көшесінің қиылысындағы алаң абаттандырылады. Мейрамханалары, Микен дүкені, асханалары, «АДК» СҮ орналасқан алаңда адамдар қарасы көп. Қала басшысы мұнда не орындық жоғын, көлік тұрағының ретсіз ұйымдасқанын әділетті бағалады.   

Дәл сол ауданда, КШТ көпірінің астындағы кеңістік те бос, жайсыз жағдайда тұр. Қала басшылығы аспаны жабық кеңістікті жастардың көңіл көтеретін орнына, спорт алаңына айналдырмақ. Мұнда, баскетбол алаңдары, теннис ойнайтын орын, жекпе-жек аренасы қойылады.

Қала әкімдігі орналасқан Премитин көшесіне де абаттандыру жүргізіледі.

Қала сыртындағы тұрғындардың ең жиі аялдайтын, демалатын орны Шешек асуы екені сөзсіз. Жазда бұлағының суын татып, қыста қалың ел сырғанаққа барады.

Қаламыздағы сәтті жобалардың бірі – үйлерді жарықтандыру жұмыстары. Қабырғаларына сәуле түскен үйлер түнгі қаланың сәнін ашып тұр. Биыл Жеңіс көшесі мен Сәтпаев даңғылы бойындағы үйлерге де бұл тәжірибе қолданылмақ. Қала басшысы бұл алдағы екі айда жүзеге асырылатынын мәлім етті.

Айдос Мырзахметов

Фото: Өскемен қаласы әкімдігінен