Шығыс Қазақстан облыстық жедел жәрдем станциясының дәрігерлері болашақ аналарды жолда абай болуға шақырып, көлікпен жүру кезінде сақтық шараларын қатаң сақтау қажеттігін ескертеді, деп хабарлайды Altainews.kz тілшісі.

2024 жылы бір ғана Шығыс Қазақстан облысында жол-көлік оқиғаларының салдарынан 33 жүкті әйел жарақат алып, олардың алтауы ауруханаға жатқызылды. Ал 2025 жылдың алғашқы екі айының өзінде болашақ аналармен үш жол-көлік оқиғасы тіркеліп, бір әйел ауыр жарақатпен жансақтау бөліміне жеткізілді. 

Республикалық деңгейде 2024 жылы Қазақстанда жол-көлік оқиғаларынан 1000-нан астам  әйел адам жарақат алды, олардың қатарында жүкті әйелдер де бар. Жолда жүрген әрбір ана – қос өмірдің иесі екенін ескерсек, бұл сандардың артында тұтас тағдырлар жатыр.

Жол апаты – көзге көрінбейтін қауіп

Дәрігерлердің айтуынша, жүктілік кезіндегі жол апаты ананың ғана емес, іштегі сәбидің өміріне де зор қатер төндіреді. Көп жағдайда болмашы көрінетін соққы мерзімінен бұрын босануға, плацентаның ажырауына, тіпті сәбидің іште жарақат алуына алып келеді.

Облыс дәрігерлері болашақ аналарды жолда сергек болуға шақыра отырып, әрбір қадамына жауапкершілікпен қарауға үндейді.