Ақылы жолдан түскен қаржы қайда жұмсалады?
pixabay.com
Қазақстанда ақылы жолдардан жиналатын қаржының қайда жұмсалатыны белгілі болды. Бұл туралы «ҚазАвтоЖол» ұлттық компаниясының басқарма төрағасы Дархан Иманашев брифинг барысында мәлімдеді, деп хабарлайды Altainews.kz тілшісі.
Оның айтуынша, 2023 жылы ақылы жолдардан 48 млрд теңге табыс түскен. Ал биыл бұл көрсеткіш шамамен 100 млрд теңгеге жетеді деп күтілуде.
«Жиналған қаражаттың басым бөлігі – яғни 60 млрд теңгеге жуығы – автомобиль жолдарын күтіп ұстауға жұмсалады. Қалған 30 пайыздай қаржыға арнайы жол техникалары сатып алынады. Мәселен, өткен жылы 470-ке жуық техника алынды. Биыл тағы 700-ге жуық техника сатып алуды жоспарлап отырмыз. Бұл шығындардың барлығы ақылы жолдар есебінен жабылады», – деді Дархан Иманашев.
Бұдан бөлек, ақылы жолдарда жүргізушілерге тиімді болу үшін айлық және жылдық абонемент қарастырылған. «ҚазАвтоЖол» ҰК» АҚ басқарма төрағасы Дархан Иманашевтың айтуынша, аталған жеңілдікті алу үшін 1403 байланыс орталығына хабарласу керек.
«Жеңіл көліктер үшін бір жылдық абонемент 1 айлық есептік көрсеткішті (1 АЕК - 3932 теңге) құрайды, ал автобустар мен жүк көліктерге айлық және жылдық абонемент жүккөтерімділігіне байланысты болады», - деді спикер.
2025 жылғы 29 сәуірдегі жағдай бойынша елімізде ұзындығы 4100 шақырымды құрайтын 21 ақылы жол учаскесі бар.
Оқи отырыңыз
