С. Аманжолов атындағы Шығыс Қазақстан университетінің Қабанбай батыр атындағы әскери кафедрасының студенттері Халық қаһарманы Қасым Қайсенов атындағы 27943 әскери бөлімінде өткен ашық есік күніне қатысты.

Іс-шара барысында болашақ офицерлер Ахмердегі әскери бөлімнің құрылымымен, сарбаздардың күнделікті өмірімен, техникалық жарақтандырылуымен және бөлімнің ішкі тәртібімен танысты.

Кездесу барысында студенттер әскери қызметке қатысты қызықтырған сауалдарын қойып, білікті мамандардан нақты жауап алды. Әскери мансапты жалғастыруды мақсат еткен жастарға аға буын өкілдері бағыт-бағдар беріп, тәжірибелерімен бөлісті.

Сондай-ақ, әскери бөлім өкілдері сарбаздарға берілетін әлеуметтік жеңілдіктер мен әскери білім мен тәжірибені жетілдіру мүмкіндіктері жөнінде тың ақпараттар ұсынды.

Ашық есік күні жастарға әскери өмірдің қыр-сырымен жақын танысып, болашақ мамандықтарын саналы түрде таңдауға серпін берген тағылымды шараға айналды.