Алакөл бағытындағы вокзалдар жаңартылып жатыр
Биыл Жалаңашкөл, Ақши және Көктұма станцияларының вокзалдарында ауқымды жөндеу жұмыстары басталады, деп хабарлайды Altainews.kz тілшісі.
Абай облысы бұрын Шығыс Қазақстан облысының құрамында болған кезде Алакөл демалыс аймағы ШҚО-ға қарайтын. Бұл курорттық аймақ жергілікті тұрғындар арасында жоғары сұранысқа ие. Облыстар бөлінгеннен кейін де шығысқазақстандықтар Алакөлге демалуға жиі барып тұрады.
Қазіргі таңда Алакөлге бағытталған вокзалдарда заманауи әрі жайлы жағдайлар жасалуда.
– Жаланашкөл мен Көктұма станцияларындағы вокзалдарда жолаушылар пойыздарының қозғалыс кестесіне сәйкес қызметкерлердің ауысымды жұмыс кестесі ұйымдастырылған. Ал Ақши станциясының вокзалы тәулік бойы жұмыс істейді, – деп мәлімдеді «Қазақстан темір жолы» ҰК» АҚ баспасөз қызметі. – Жазғы маусым қарсаңында вокзалдарда санитарлық аймақтар, күту залдары жаңартылып, жарықтандыру жақсарды және вокзал маңы абаттандырылды.
Бұдан бөлек, жолаушыларды уақтылы ақпараттандыру үшін барлық вокзалдарда дауыс зорайтқыш жүйесі жұмыс істейді. Жалаңашкөл мен Ақши станцияларында билет кассалары да қызмет көрсетуде.
– Қазақстан Республикасы Үкіметінің қаулысына сәйкес, вокзал шаруашылығы нысандарын жаңғырту жұмыстары басталды. Биыл Жалаңашкөл, Ақши және Көктұма станцияларында жөндеу жұмыстары жоспарланған, – деп толықтырды компанияның баспасөз қызметі.
Елизавета Седых
Оқи отырыңыз
