Мемлекет басшысы Қасым-Жомарт Тоқаев құқық қорғау органдарының кеңейтілген алқа отырысында сөз сөйлеп, саланың маңыздылығына тоқталып, еліміздің тыныштығы жолында аянбай еңбек етіп жүрген азаматтарға алғыс білдірді, деп хабарлайды  Altainews.kz тілшісі Ақордаға сілтеме жасап.

Ақмола облысында қолға алынған «Зиялы қауым» жобасы ауылдағы тыныштық пен қауіпсіздікті сақтауда жаңа серпін беріп отыр. Бұл бастама – жергілікті билік, ақсақалдар және шаруалар бірлесе жұмыс істеп, учаскелік инспекторларға қолдау көрсететін үлгілі тәжірибе.

Мемлекет басшысы Қасым-Жомарт Тоқаев бұл жобаны құқық қорғау органдарының кеңейтілген алқа мәжілісінде ерекше атап өтті. Оның айтуынша, заң мен тәртіп тек полицияның емес, бүкіл қоғамның ортақ міндеті болуы керек. Ауыл әкімдері, ардагерлер мен жергілікті тұрғындар бірігіп жұмыс істесе, ел ішінде тәртіп те, тыныштық та сақталады. 

«Зиялы қауым» жобасының басты ерекшелігі – учаскелік инспекторлар жалғыз емес. Олармен бірге ауыл ақсақалдары, беделді азаматтар мен шаруалар тәртіпті бақылауға атсалысып жүр. Тұрғындар тәртіп сақшыларына тек бақылаушы ретінде емес, серіктес ретінде қарай бастады.

Бұл – азаматтық жауапкершіліктің нақты көрінісі. Жоба арқылы полиция мен халық арасындағы сенім артып келеді. Қарапайым ауылдарда ұрлық-қарлық азайып, тұрғындар қауіпсіздікке бейжай қарамайтын болған.

Президент осындай бастамалар басқа өңірлерде де жалғасын табуы керек екенін айтты. Жергілікті жұрттың өзі тәртіпке үлес қосса, қоғам да тұрақты, мемлекет те мықты болады.