Марқакөл ауданында халықтың өмір сүру сапасын арттыру мақсатында су беру жүйелерін жаңғырту және коммуналдық инфрақұрылымды жөндеу жұмыстары жалғасып жатыр, деп хабарлайды Altainews.kz тілшісі.

Өңірлік коммуникациялар қызметінде өткен брифингте Марқакөл ауданы әкімінің міндетін уақытша атқарушы Нұрсұлтан Бейсенов атқарылып жатқан жұмыстар туралы баяндады.

Бүгінде ұзындығы бір шақырым тозған су құбырлары жаңартылып, 55 су краны ауыстырылған. Сонымен қатар, құдықтарды судан оқшаулау жұмыстары қарқынды жүргізілуде. 1-ші және 2-ші су көтеру станцияларына қажетті сорғы қондырғыларын сатып алу мен жеткізу бойынша келісімшарт жасалып, дайындық шаралары қолға алынған.

Сонымен қатар Теректі ауылдық округіндегі орталықтандырылған қазандыққа ағымдағы жөндеу жұмыстары жоспарланған. Бұл бағытта екі қазандыққа жөндеу жүргізу, бір қазандықты толық ауыстыру, апатты деп танылған түтін құбырын жаңарту және ішкі электр желілерін жөндеу көзделген. Аудандық бюджеттен бұл жұмыстарға 10 миллион теңге бөлініп, жұмыстар басталып кеткен.

Аталған шаралар ауыл тұрғындарын сапалы ауызсумен және тұрақты жылумен қамтамасыз етуге бағытталған.