Өскеменде өткен «Креативті индустриялар – аймақтың инвестициялық тартымдылығының факторы» атты семинарда шығармашылық бағыттағы кәсіпкерлер мен мамандар бас қосты. Шараны қала әкімдігіне қарасты OSKEMEN CREATIVE орталығы ұйымдастырды, деп хабарлайды Altainews.kz тілшісі.

Семинар жұмысына креативті индустрия саласында еңбек етіп жүрген кәсіпкерлер, дизайнерлер, IT-мамандар, жарнама мен өнер саласының өкілдері, сондай-ақ мемлекеттік құрылымдар мен қоғамдық ұйымдар қатысты. Шараның модераторы – Қазақстан Креативті Индустриялар Альянсының президенті, дизайнер және бизнес-жаттықтырушы Айка Әлемі.

Ол қатысушылармен өз тәжірибесімен бөлісіп, креативті жобаларды нарыққа шығару, халықаралық деңгейге көтеру, бренд қалыптастыру, сондай-ақ инвесторлармен жұмыс істеу және инвестициялық жобаларды қорғау тәсілдері туралы баяндады.

Семинар бағдарламасында креативті жобаларды іске қосу және экспорттау, инвесторлар, дистрибьюторлар мен байерлерді тарту жолдары туралы сөз болды. Сонымен қатар кино, музыка, сән, ойын және киберспорт бағыттарына арналған инкубаторлар мен акселераторлар мәселесі талқыланды. Презентация, интерактивті дәріс пен пікірталас түрінде өткен жиында аймақтың инвестициялық имиджін арттыру мүмкіндіктері қарастырылып, танысу, тәжірибе алмасу және серіктестік құруға бағытталған нетворкинг ұйымдастырылды.

Семинардың маңызды бөлігі – креативті жобалар питчингі болды. Қатысушылар өз идеяларын ортаға салып, сарапшылардан кері байланыс алды. Олардың қатарында қысқаметражды және деректі фильмдер түсіруге арналған толық циклді продакшн-стадия ашу,  «EasyMap» – инклюзивті локациялар картасы, экологиялық таза киім мен аксессуарлар компаниясы, «BAY»  – асыл және табиғи тастардан зергерлік әшекей бұйымдар жасау өндірісі, Марқакөлдегі туристік жобалар бар. Жиында қолөнер мен білім саласындағы тың бастамалар мен идеялар ұсынылды.

Ұйымдастырушылардың айтуынша, бұл шара Өскеменнің креативті экономика бағытын айқындап, жаңа мүмкіндіктерге жол ашады.

Фото/видео: Жалғас Сақадиев