Естеріңізге сала кетейік, қаңтар айының ортасында Бұқтырма өзенінде су деңгейінің көтерілуі байқалды, деп хабарлайды Altaynews.kz тілшісі.            

«Қазгидромет» РМК ШҚО және Абай облысы бойынша филиалының өкілі Инкар Асқарованың айтуынша, 2024 жылғы 12 қаңтардан бастап Барлық ауылындағы Бұқтырма өзенінің гидрологиялық бекетінде су деңгейінің көтерілуі байқалған.

Облыстың қалған су бекеттеріне келетін болсақ, қазіргі кездегі жағдай тұрақты. Өзендердегі су деңгейі шекті белгіден төмен.

«Қазгидромет» филиалы мамандарының болжамы бойынша, су тасқыны кезінде өзендердегі су деңгейінің көтерілуі шекті көрсеткіштен асып кетуі мүмкін.

Қауіпті шекті белгіден асқан кезде өзен ағысы бойынша төмен орналасқан елді мекендерді су басу қаупі сақталады.

Инкар Асқарова ақпан және наурыз айларында күн күрт жылынып, қатты жаңбыр жауған жағдайда ШҚО аумағында еріген қар мен жаңбыр суының тасқыны және беткейлік ағындар пайда болуы мүмкін екенін атап өтті.

                                                                     Айжанат Бақытқызы