Өскемен гарнизонында Кеңес Одағының Батыры, Халық Қаһарманы, Тәуелсіз Қазақстанның тұңғыш Қорғаныс министрі, Армия генералы Сағадат Нұрмағамбетовтің туғанына 99 жыл толуына арналған еске алу шарасы өтті.

Қазақтың даңқты қолбасшысын еске алуға Қарулы Күштердің әскери қызметшілері мен ардагерлері, әскери кафедра студенттері, әскери-патриоттық қозғалысының, мамандандырылған сыныптардың тәрбиеленушілері, қоғам қайраткерлері мен жергілікті атқарушы органдардың өкілдері қатысты, деп хабарлайды Altaynews тілшісі.

Жиналғандар Сағадат Нұрмағамбетовтің ескерткішіне гүл шоқтарын қойды.

 Ұлы Отан соғысы жылдарында Сағадат Нұрмағамбетов Краснодар өлкесін, Украинаны, Молдавияны, Батыс Белоруссия мен Польшаны азат етуге қатысты. Польша аумағында жаудың қорғанысын бұзып өтуде қолбасшылықтың жауынгерлік тапсырмаларын бұлжытпай орындағаны, сонымен бірге көрсеткен ерлігі мен қаһармандығы үшін оған Кеңес Одағының Батыры атағы берілді.

Сағадат Нұрмағамбетов небәрі 21 жасында Кеңес Одағының Батыры атанған. Магнушев плацдармында болған шайқаста ол басқарған пулемет ротасы 2 күн ішінде 120 фашист пен 12 пулемет орналасқан нүктенің көзін жояған. Өскемендіктер қазақтың осындай даңқты ұлдарымен мақтанады.