Бүгін өңірде 533 сайлау учаскесі ашылды. Қазір әрқайсында дауыс беру процесі белсенді жүріп жатыр.

Облыста 502 учаске ерекше қажеттіліктері бар азаматтар үшін көру қабілеті нашар сайлаушыларға арналған арнайы аудио материалдармен және трафареттермен арнайы жабдықталған, деп хабарлайды Altaynews тілшісі.

Ресми түрде сайлау учаскелері сағат 7:00-де ашылып, жұмысын 20:00-де аяқтайды, алайда өңірдегі 9 сайлау учаскесіне басқалардан өзгеше шарттар белгіленген.

Оларда тізімге енгізілген барлық сайлаушылар дауыс берген жағдайда, дауыс беру кез келген уақытта аяқталуы мүмкін.

- Мұндай учаскелер емдеу мекемелерінде, әскери бөлімдерде немесе облыстың шалғай аудандарында орналасқан. Мысалы, учаскелердің бірінде дауыс беру таңғы сағат 6.00-ден басталды, бұл - әскери бөлім, - деп түсіндірді ШҚО сайлау комиссиясы төрағасының орынбасары Жанар Алканова.

Сайлау барысын саяси партиялардың өкілдері, аккредиттелген қоғамдық бірлестіктердің мүшелері, кандидаттардың сенім білдірілген адамдары және халықаралық бақылаушылар бақылайды.