Семейлік «Алтай» футболдан Қазақстан кубогы үшін жарысты аяқтауға мәжбүр болды. Жаңа ғана аяқталған жарыстың ширекфиналдық кездесуінде жерлестеріміз «Атырауға» жол берді, деп хабарлайды Алтайньюс тілшісі.

Бұл матч Семейдің «Спартак» стадионында ойналғанын айту керек. Ел кубогының 1/8 финалындағыдай (ол ойында «Алтай» Қазақстан чемпионы «Астананы» қапы қалдырып, нағыз сенсация жасаған болатын) Сергей Тимофеев шәкірттері бұл жолғы кездесуді де ойын соңындағы пенальтилер сериясына жеткізді. Алайда, «Астанаға» қарағанда, «Атырау» өз мүміндіктерін сәтті пайдаланды. Нәтижесінде пенальтилер сериясы 1:3 есебімен қонақтар пайдасына аяқталды.

Айта кетейік, бұл кездесудің негізгі және қосымша уақыттарында 1:1 есебі тіркелген. Біздің команда сапында жартылай қорғаушы Владимир Вяткин көзге түсті.

Келесі ойынын алтайлықтар 11 мамыр, сенбі күні өз алаңында өткізеді. Бұл күні семейлік футболшылар шымкенттік «Академия Оңтүстік» командасымен кездеседі.