Қазақстан кубогы үшін жарыстың 1/8 финалында ел чемпионы «Астанадан» басым түскен семейлік «Алтай» ширек финалда «Атырауға» қарсылас атанбақ.

Айта кетейік, атыраулық футболшылар жарыстың өткен кезеңінде Талдықорғанның «Жетісуынан» айласын асырған болатын. Есеп 1:0. «Алтай» болса, дәл сол кезде құрамында бірқатар танымал футболшысы бар «Астананы» тізе бүктіріп, нағыз сенсация жасаған-ды (1:1, пенальтиден 15:14).

«Алтай» мен «Атырау» арасындағы ойын 8 мамыр, сәрсенбі күні Семейдің «Спартак» стадионында өтетінін айта кеткен жөн.

Жалпы, семейлік команда үшін биылғы маусым аса сәтті басталды деуге толық негіз бар. Қазақстан кубогы үшін жарыста азулы «Астананы» сақ соқтырған жерлестеріміз ел біріншілігінде де қатарынан екі жеңіске жетіп, әзірге чемпионат көшін бастап тұр.